Әнші, композитор Арман Дүйсеновтің «Жұлдыз отбасы» журналына берген сұхбатын ұсынамыз.  
Өнерге келмеуіме ешқандай «шанс» болған жоқ
– Неге бүгінгі музыканттардың кәсіби деңгейі төмен? Бұрынғы «Дос-Мұқасан», «Қарагөз» ансамбльдері және өзіңіз секілді музыканттар неге аз?
– Кеңес заманында көркемдік кеңес болатын. Ол ұсынылған шығармалардың барлығын міндетті түрде сараптап, електен өткізіп отыратын. Оның ішінде белгілі бір идеологияға сәйкестері ғана эфирден өтетін. Осындай арнайы заң болған. Бүгінгі таңда демократиялық қоғамда өмір сүріп жатқан соң, біз кез келген шығармашылық адамына мүмкіндік береміз. Бірақ оның негізгі сарапшысы – халық. Тыңдайды, көңілінен шықса өзінің бағасын береді. Халық өзінің әділ бағасын беріп, тұшымды дүниені ғана қалдырады. Бұл мәселеге менің де қарным ашады. 90-жылдары қиын кезеңде біз бірталай нәрсені жіберіп алдық. Бірақ, Құдайға шүкір, сіз аңсайтын сол дәуір біртіндеп қайтып келе жатыр. Өйткені қазір жылдан-жылға тәжірибелі, кәсіби музыканттар көбейіп келеді. Өнер академиясы, консерватория, түрлі музыкалық колледждерден басқа институттардың факультеттерінен білікті музыкант мамандар тәрбиеленіп жатыр. Барлығына бірдей сын көзбен қарау дұрыс емес шығар. Кейде кішкене кешіріммен қарайтын тұстар да болады.
– Жеңіл-желпі, мағынасы жоқ әндер де көбейіп кетті...
– Ондай нәрселерді тәжірибесіз, біліксіз, музыкалық сауаты жоқ аранжировшылар мен өңдеушілер тудырып отыр. Мұндай әлсіздікті болдырмау үшін сен, мен, қоғам болып жұмыс жасауымыз керек. Бұл дерттің дауасы – сол. Қазақ өнерінде аты шыққан мамандар міндетті түрде шәкірт тәрбиелейтін болса, бірте-бірте олар көбейіп, халыққа кәсіби, шоқтығы биік туындыларды ұсынатын болады.
– Бірнеше жыл Динара Қырықбаевамен бірге жұмыс істедіңіздер. Бірақ кейіннен араларыңыз жақсы болмай қалғанын естіген едік. Осы рас па? Әлі де әндеріңізді орындай ма?
– Динара екеуміздің қарым-қатынасымыз жақсы. Керісінше, шәкіртім әлі күнге дейін мереке сайын құттықтап тұрады. Құдайға шүкір, Динара өзінің теңін тауып, шаңырақ көтерді. Бақытты болсын! Қарындасыма кішкентай күнінен бастап ұстаздық еткенім рас. Динара екеуміз бірталай әндер жаздық, дуэт те болдық. Сахнада біраз өнер көрсеттік. Кейін Динара «менің ән айтқым келмейді. Басқа саланың маманы боламын» деп шешім қабылдағаннан кейін өнерден ол біршама уақыт алшақтап жүрді. Әнге қатысы жоқ адамға менің де қатысым болмайды. Басқа саланың адамына үлгі-өнеге, тәлім-тәрбие бере алмаймын ғой. Өйткені мен өз саламның маманымын.
– Сіз қай жердің тумасы боласыз? Өнер әлеміне қалай келдіңіз?
– Мен Орал қаласында дүниеге келдім. Әкем саксофоншы, дирижер, композитор – Нариман Жұмағалиұлы Дүйсенов. «Ақжайық», «Бипыл» ансамбльдерінің негізін қалаушылардың бірі болған. Марқұм анам Қойсан Кәрімқызы Дүйсенова – дәстүрлі әнші, Ғарифолла Құрманғалиев мектебінің өкілі әрі шебер күйші болған. Екеуі де кезінде Мәскеу, Норвегияның Осло қалаларына дейін барып өнер көрсеткен өнерпаздар. Өзімді бала кезімнен тәрбиелеген әжем Қараш Бөлекбайқызы, қазақтың жыр-дастандарын жатқа айтып, орайы келгенде суырып салатын қасиеті бар әрі ақын, әрі жыршы болған. Осындай отбасынан шыққан соң өнерге келмеуіме ешқандай «шанс» болған жоқ. А.Жұбанов атындағы мектеп-интернатында оқыдым. Консерваторияны, аспирантураны бітіріп, одан кейін жоғарғы оқу орнында ұстаз болып қызмет істедім.
Қателіктер қырық түгілі алпыс жаста да кетіп қалып жатады
– «Ауылдағы оқушы қыз» атты әніңіздің шығу тарихын айтып берсеңіз...
– Көңілді, биге келетін бір ән жазған болатынмын. Серік Сейітман деген ақын бауырыма осы әнге тақырып таба алмай жүргенімді айттым. Ақынның қаламы кейде қисынға, логикаға бағынбайды. Әнімді тыңдап отырып «ойнақы, шамалы әзілге бұралған ән екен» деді. Сол шабыттың нәтижесінде осы туынды дүниеге келді. Сөзін қарап едім, әнге, аранжировкаға лайық. Сөйтіп ертесінде «Ауылдағы қыз» деп жарыққа шығарып жібердім.
– Бұл әнге ауылда қалып қойған алғашқы махаббатыңыздың қатысы жоқ па?
– Жоқ...(күліп). Егер көркемірек болсын десем, әлбетте неше түрлі әңгімені соғуыма болады. Бірақ бұл әннің шығу тарихы поэзияға емес, әлдеқайда прозаға жақын. 

Дәреже: 0.0/0


Қаралды: 97, Қосылды: 15.03.2016

Пікірлер 0








Біз Вконтакте
желісіндеміз

Сайттың жаңа дизайны ұнадыма?

Жауап бергендер: 773
Онлайн отырғандар: 15
Қонақтар: 15
Қолданушылар: 0
0:00 0:00
Saz-Alemi player