Қазақ Хандығының 550 жылдық мерейтойы қарсаңында түсіру жұмыстары басталған «Қазақ елі» анимациялық фильмінің тұсауы кесілді, деп хабарлайды Baq.kz тілшісі. Мәдениет және спорт министрлігінің тапсырысымен түсірілген тарихи анимациялық туындыны дайындауға бір жылға жуық уақыт жұмсалған.  
 «САҚ-дала» киностудиясында түсірілген туынды Керей мен Жәнібек ханның балалық шағы мен хандық құрған тұсына негізделген. Жасөспірімдердің патриоттық танымын арттыру үшін жасалған тарихи фильмнің сценарийін Сағидолла Нүсіпәлі мен Бақытжан Құлжабай жазып, белгілі актер Сәбит Әбдіхалықов продюсерлік жасаған.

Картинаның маңыздылығын Керей мен Жәнібектің балалық шағы мен есею жылдары одан сайын аша түседі. Жауынгерлік өнер мен ғылым жолын меңгерулері толықметражды анимациялық фильмде көрініс тапқан. Ұлан ғайыр қазақ даласының шексіз атырабындағы Сығанақ, Отырар, Тараз, Түркістан сынды тарихи қалалардың орны айшықталып берілген. Сонымен қоса, туындыны дайындау барысында министр Арыстанбек Мұхамедиұлы кеңесшілік жасап, тарихшы ғалым Жамбыл Артықбаев пен белгілі жазушы Дулат Исабековтың пікір ұсыныстары ескерілген.

Ал фильм актерлерінің дауысын дыбыстауда Ғ.Мүсірепов атындағы балалар мен жасөспірімдердің академиялық театры мен Ж.Шанин атындағы ОҚ облыстық драма театрының әртістері жұмылдырылыпты. Сәкен Майғазиев сынды әншілер фильм барысындағы халық әндерін шырқайды.

Анимациялық туындының режиссері Батырхан Дәуренбековтің сөзінше, мұндай туындылар өте ұзақ уақыт дайындалады. Дегенмен шығармашылық ұжым уақытты созбай, бірер жылдың ішінде дайындап шығарған. «Туындымызды он ай ішінде аяқтап болдық. Межелеген уақытта көрерменге ұсынамыз деген ойымыз толық жүзеге асты. Бірақ фильм барысында қателік орын алмас үшін күні-түні еңбектеніп, ұжым толық ат салысып толықметражды фильмді дайындап шығарды», дейді ол.

Бас продюсер Сәбит Әбдіхалықов: «Фильмнің бюджеті әзірше құпия сақталады. Қазақ хандығының 550 жылдық мерейтойы қарсаңында министрліктің тапсырысы бойынша қолға алынған еді. Уақытында түсіріп үлгердік. Енді еліміздің барлық кинотеатрларында «Қазақ елі» туындысын барлық ел тұрғындары тамашалай алады. Тәуелсіздік күні қарсаңында барлық телеарналардың эфирінен көрсетеміз деп ойлаймын» дейді.
«Қазақ елі» мультфильмі 19 мамырдан бастап Қазақстан бойынша барлық кинотеатрларда көрсетіле бастады.

Дәреже: 0.0/0


Қаралды: 84, Қосылды: 18.05.2016

Пікірлер 0








Біз Вконтакте
желісіндеміз

Сайттың жаңа дизайны ұнадыма?

Жауап бергендер: 814
Онлайн отырғандар: 22
Қонақтар: 22
Қолданушылар: 0
0:00 0:00
Saz-Alemi player