Елорда тұрғындары мен қонақтары үшін, Ресейдің мәдени ошағының бірі саналатын Санкт-Петербург қаласынан келген балауыз мүсіндерін қала күні мен тәуелсіздіктің 25 жылдығына арналған екен
Естеріңізде болса, бала кездеріңізде талайыңыз, әсіресе электр жарығы жете қоймаған орталықтан алыс ауылдарда өске қарасирақтар білетін боларсыздар. Кешкі тамақ ішіп болғанша жарық болсын деп жағып қоятын ондық шамның еріп аққан қалдық майынан түрлі пішіндегі өз қиялымыздан құрастырып алған бірдеңені жасаушы едік қой. Әсіресе жазғы ыстықта өз-өзінен жұмсарып, еріп тұрған балауыз икемге тез келетін. Ермексазға (пластилин) қол жетпеген балалардың көбі шамның майымен мүсін жасауға әуес еді.Сөйтсек бұл мәдениет әлемінде әжептәуір атағы бар өнердің бір түрі екен. Бұған дейін де қазақстандық шеберлер балауызбен мүсін жасап, ел назарына ұсынып келген болатын. Ал, бүгіннен бастап Астана төрінде де дәл осындай балауыздан жасалған мүсіндер көрмесі өте бастады.
Көрмеге Санкт-Петербург қаласының балауыз мүсін шеберлерінің қолынан туындаған дәстүрлі 40-қа жуық балауыз мүсіндер қойылды.
Әйгілі актерлер, тарихи тұлғалар және императорлар мен саясаткерлер орналасқан көрмеде ертегі кейіпкерлері мен мультфильм кейіпкерлері де орын алыпты. Сонымен қатар ежелгі Грецияның аты аңызға айналған Минотавр Сфинкс мүсіні де көрменің көркін қыздырған. Ал атақты спортшылар футбол королі Пеле мен бокстан әлемдік деңгейдегі шебер Майк Тайсонның айнытпай салынған бейнелері келушілерді тамсандырары анық. Көрермендердің қызығушылығын оятатын тағы бір ерекше мүсіндер – қазіргі таңда әлемдік деңгейдегі киножұлдыздардың бейнесі болмақ. Анжелина Жоли, Бред Пид қатарлы майталмандардың шынайылығы тамсандырады. Ал әсіресе жастардың сүйіп көретін «Национальная охота и рыбалка», «Звездные войны» фильмінің актерлері мен фантастикалық фильмдерден «Аватар», «Пираты карибского моря», «Властелин колец», «Гарри Поттер» қатарлы әйгілі кинотуындылардың бас кейіпкерлерінің бейнесі көрермен назарын өзіне баурайтыны анық.
«Барлық көрмеге қойылған мүсіндер - өткен ғасырларда ғұмыр кешкен немесе қазіргі таңда аты аңызға айналған саяси тұлғалар, сүйікті кейіпкерлеріміз, кино әлемінде өзіндік қолтаңбасы бар әйгілі өнер жұлдыздары. Бұны ұйымдастырудағы басты мақсатымыз халыққа осындай өнер барын насихаттау. Әрі Тәуелсіздіктің 25 жылдығына тарту. Қала күні мерекесіне орай елорда тұрғындарына қуаныш сыйлау. Алдағы уақытта бұл көрме еліміздің басқа қалаларында да жалғасын табатын болады – дейді көрменің ұйымдастырылуын жауаптанған Бейбітшілік және Келісім сарайы Бас директорының орынбасары Айдархан Әділбаев.
Бейбітшілік және келісім сарайында ашылған көрменің тағы бір ерекшелігі мұнда қазақтан шыққан алғашқы балауызбен мүсін жасаушылардың бірі Айдос Есмағамбетовтің де еңбектері қойылған. Айдостың қолынан шыққан ҚР президенті Нұрсұлтан Әбішұлының, Абылай ханның, АҚШ президенті Барак Обаманың мүсіндері әрбір деталінің, әрбір қимылының, мимикасының нақтылығымен таңғалдырары сөзсіз.
13 шілдеден 21 тамыз аралығында бір айдан астам көпшілік назарына ұсынылатын көрмені тамашалауға қала халқы әлден-ақ асыға бастапты.


















Дәреже: 0.0/0


Қаралды: 56, Қосылды: 13.07.2016

Пікірлер 0








Біз Вконтакте
желісіндеміз

Сайттың жаңа дизайны ұнадыма?

Жауап бергендер: 749
Онлайн отырғандар: 20
Қонақтар: 20
Қолданушылар: 0
0:00 0:00
Saz-Alemi player