Опера әншісі "Замана” басылымына берген сұхбатында бұл құпияларын елге айтып берді.
Опера – өнердің шыңы. Сондықтан бұл бекзат өнер әркімнің бағына бұйыра бермейді. Оған тек табиғи таланттылар ғана шыға алады.
Оңтүстіктен шыққан дарын иесі Нұржамал Үсенбаеваны операның жарық жұлдызы деуге әбден болады. Ол – Нью-Йорк қаласындағы сан ғасырлық тарихы бар «Карнеги-холл» концерт залында жеке концертін берген жалғыз қазақ қызы. Қазақстанның Халық әртісі, Мемлекеттік сыйлықтың иегері. Аяулы жар, сүйікті ана, әже. Таяуда ол кісі өзі туып-өскен Оңтүстік өңіріне арнайы келіп, Шымкентте биыл 19-шы мәрте өткізіліп отырған халық­аралық «Қазақ романсиадасы» байқауына қазылық етті. Соңынан Оңтүстік Қазақстан мемлекеттік педагогикалық институтының студенттерімен кездесу өткізді. Орайы келгенде біз ол кісіні әңгімеге тарттық.
– Нұржамал Пернебекқызы, алғаш­қы сұрақты өнеріңізге қатысты қойсақ. Сіз опера өнерінің шыңына шыққан әншісіз. Дегенмен әлі де орындалмаған арманыңыз бар ма?
–  Опера, музыка – менің өмірімнің бір бөлшегі. Оның ғұмыры шексіз. Сондықтан дәл мына уақытта оның шыңына шығамын немесе шықтым деп айтуға болмайды. Бастысы, сол жолда талмай еңбек ету керек. Әрине, алда көптеген операдағы жаңа партия­ларға, концерттік бағдарламаларға жоспар жасап отырмын. Мәселен, мен әрда­йым камералық музыкаға қызығатынмын, соның ішінде, мысалы, Арнольд Шенберг пен Пауль Хиндемиттің шығармаларын жаңадан да­йындасам деймін.
– Әйелге отбасы тірлігі мен әншілікті берік ұстау үшін, екеуін ұштастыра білу үшін не керек?
– Екі жақты тең ұстау үшін ең алдымен отбасы мүшелерінің, жарыңның түсінігі мен қолдауы өте маңызды. Мен өзімді бақытты адам санаймын. Себебі мұның бәрі менде бар. Өнерімді менен жақсы түсінетін сүйікті жарым бар. Осы қасиеті үшін мен оған өмір бойы риза болып өтетін шығармын. Ол кісі менің өнер жолында өркендеп өсуіме, шарықтап дамуыма зор мүмкіндік беріп, демеу болып келе жатыр. Егер Төлеген де өнер адамы болмағанда, мені қызғанып, әншілікпен айналысуыма қарсы болғанда, бәлкім бүгінгідей Нұржамал Үсенбаева болмас па едім деп те ойлаймын кейде.
– Өмірде түрлі жағдайлар болады. Сынға ұшырай қалсаңыз, ондай кезде жігерді қайдан аласыз?
– Ата-анам мені еңбектен қорықпауға үйретті. Әкем үнемі: «Өзіңе сен, еңбек қана биікке жетелейді», – деп айтып отыратын. «Істеген ісіңнен ләззат ала біл, жаның қалаған тірлікпен айналыс, қызым!» – деген сөздерді жиі айтатын. Қиналған сәттерімде осы сөздер есіме түседі, сосын өз-өзімді қамшылап, өнерімді дамытуға күш саламын.
Өмірде кездескен болмашы қиындыққа беріле салуға болмайды. Уақыт – ең керемет емші. Адамның мінез-құлқы, оның жақындары мен туыстарының қолдауы қиындықтармен күресуге көмектеседі. Сондықтан алдыңыздан қандай да бір кедергі шықты ма, онда оны ең жақын адамыңызға айтыңыз, сыр бөлісіңіз. Оны бірлесе жеңуге тырысыңыздар.
– Төлеген ағамыздың «Инстаграмдағы» парақшасынан сізге деген шынайы сезімін, сіздің күлкіңізге ғашық екенін аңғарамыз. Мұның сыры неде?
– Егер жұбайлар бір-біріне түсіністікпен қарап, қолдау жасап отырса, бірін-бірі барлық кемшіліктерімен, табиғи болмысымен қабылдаса, одан өзгеруді талап етпесе, махаббат ешқашан сөнбейді. Өзің сүйе отырып сүйікті бола білуің керек, сонда ол да сен үшін жақсы көрінуге тырысатын болады.
Негізі әйел адам еркектің алдына түсіп шапқылай бермеуі керек. Отбасындағы барлық мәселені күйеуіңіздің шешуіне мүмкіндік жасаңыз. Кез келген мәселеде ол кісінің ақыл-кеңесін сұрап, оған өзіңіздің әлсіз екеніңізді сездіріп отырыңыз. Сонда ғана олар әйеліне қамқор болады, өзін отбасының тірегімін деп түсінеді.
– Бір кездері өзіңіз де келін болдыңыз, қазір ене атанып, келіннің қолынан шай ішіп отырған шығарсыз. Жалпы, ене мен келіннің қарым-қатынасы қандай болуы керек?
– Біреулер келінге қатал болу керек, айтқаныңды істете біл дейді. Енді бірі келінді қызыңдай көр, оны өзіңе жақын тарт деп отырады. Мен осы пікірлердің соңғысын ұстанамын. Ұлымыз Дәурен осыдан бірнеше жыл бұрын шаңырағымызға Анар есімді қызды келін етіп түсірді. Содан бері бірге тұрамыз. Құдайға шүкір, олардан тараған үш немерені бағып-қағып отырмыз. Мен Анарды ешқашан келінім деп қараған емеспін. Өз қыздарым қалай киінеді, оған да сондай еркіндік берілген. Үнемі оның пікірін тыңдап, керегін кәдеге жаратып отырамын. Сондықтан ба, Анарым да мені алақанына салып отыр. Үйдің бар тірлігі соның мойнында, мені асхана тірлігіне араластырмайды. Меніңше, қазіргінің енелері мен келіндері осындай қарым-қатынаста болуы керек.
– Әйелдің жасын сұрамайды дейді ғой, дегенмен сіздің алпыстың ауылына жақындап қалғаныңызды білеміз. Бірақ өте жас көрінесіз. Мұның сыры неде?
– Мен өсек-аяңға, өнер адамдарының арасындағы сыпсың сөздерге еш уақытта мән берген емеспін. Ол үшін уақытымды да, жүйкемді де аяймын. Көп ашуланбаймын. Айналамдағы адамдардың бітім-болмысы қандай, оларды сол күйінде қабылдаймын. Жас көрінуім­нің басты себебі – осы.
Ал екіншіден, Төлеген екеуміз таза ауада, тау бөктерінде серуендегенді, бассейнге барғанды ұнатамыз. Өзге әншілер секілді жарытып диета да ұстамаймын. Тәбетім тартса, алдымда тұрғанның бәрін жей беремін. Бірақ жиі гимнастикалық жаттығулар жасап тұрамын. Сондай-ақ косметологтар мен массажистердің көмегіне жүгінетін кездерім болады. Денсаулықты күту үшін біреуге жамандық ойлауға, теріс эмоциялар шығаруға болмайды. Үнемі жақсы ойда болу, қуанышты жүру әсіресе әйелдерді әдемі көрсетеді және жасартады.
Жалпы, әр адам өзінің арманына ұмтылғаны жөн. Ол үшін, әлбетте, тек еңбектену керек. Өзіңе сенуің, өмірді сүюің қажет. Арманыңа жетелер жол – ең қызықты әрі қиын жол. Бас­тысы, сол жолдан таймауға тиіссің.
– Уақыт бөліп, әңгімелес­кеніңізге рахмет!
Сұхбаттасқан – С. КЕНЖАЛИЕВА.


Дәреже: 0.0/0


Қаралды: 42, Қосылды: 09.11.2016

Пікірлер 0








Біз Вконтакте
желісіндеміз

Сайттың жаңа дизайны ұнадыма?

Жауап бергендер: 703
Онлайн отырғандар: 12
Қонақтар: 12
Қолданушылар: 0
0:00 0:00
Saz-Alemi player