Загрузка...
Осыған дейін "МелоМен" тобынан Жігер Ауыпбаев кетеді деген ақпарат тараған еді. Ұжым фанаттары бұған қарсы болып, редакциямызға хабарласқан да болатын. Журналист Асхат Садырбай осы күнге дейін еш жерге сұхбат бермеген экс-меломендік Жігер Ауыпбаевтан арнайы Baistars.kz үшін эксклюзив сұхбат алды. Назарларыңызға ұсынамыз.
«MeloMen» тобынан Жігер кетті деген ақпаратты естігенде кезекті пиар шығар дедім да мән бермей қоя салдым. Сөйтсем бәрі рас, топтың жігіттері телеарналарға ашық сұхбат бере бастаған, Жігердің инстаграмында күйзеліске толы посттар. Жағдай сұрайын деп хабарластым, сұрадым, білдім. «НұрМұқасан», «Арай» тобының басына туған күн «Меломенге» де туған екен.
Асхат: Жігер, не болды, мұндай шешім қабылдауға не себеп болды? Мұның себебін сенен басқа ешкім білмейтін сияқты.
Жігер: Топтан кетуімнің себебі бар. Ол - төртеуміздің арамыздағы әңгіме. Оны халыққа ашып айтудың қажеті жоқ деп ойлаймын. Себепсізден себепсіз кеткен жоқпын, себеп болды.
Асхат: Жігіттердің сөздеріне қарасаң олай емес. Мен Ғабитпен де сөйлестім. Себеп неде: ақшада ма, діни көзқараста ма, адами қарым-қатынаста ма десем, ол «ешқандай себеп жоқ» деп жауап берді.
Жігер: Аллаға шүкір, осы уақытқа дейін арамызға ақша немесе басқа да нәрсе түсіп көрген емес. Бұл жолы осындай қиын жағдай боп қалды. Мүмкін бір-бірімізден шаршағандықтан да болар, мүмкін бір-бірімізді бағаламай да кеткен шығармыз, білмеймін. Жігіттермен арамызда түсініспеушілік нәрсе өте көп болды, бірақ, оның бәрі - арамыздағы нәрсе.
Асхат: Жігіттердің сөзіне қарасақ, сені тыңдап отырсам, жігіттер сенен емес, сен жігіттерден шаршаған сияқтысың ғой? Олардың Жігер жеке шыққысы келген болар деген болжамы қате болмай шықты ғой?
Жігер: Иә, бір сұхбаттарында солай депті. Алайда мен топта жүріп те жеке шығармашылықпен айналыса беруіме болатын еді. Менің үлкен өнерге қадам басуыма себеп болған «Меломен» тобының құрамында жүре берген мың есе артық еді. Өйткені қазір топ жақсы жұмыс істеп, біраз үзілістен соң халықтың сұранысына ие болып келе жатыр. Бар себеп - жігіттермен болған өз арамыздағы келіспеушілік.
Асхат: Демек, сен топқа ренжулі емессің, бірақ топтың құрамындағы жігіттерге ренжулісің ғой?
Жігер: Әрине, әрине.
Асхат: Егер топтың құрамы басқа өнерпаздармен алмастырылса, сен ол топта ән айта бересің, солай ма?
Жігер: Иә. Жігіттерге тағы бір ренжіген жерім - бұқаралық ақпарат құралдарына «Жігер топтан себепсізден себепсіз кетті» деп сұхбат бергендері. Қанша уақыттан бері біз бұл мәселені талқылап жүргенбіз. Мен өзім рухани қатты құлазып, анамды алып Меккеге кіші қажылыққа кеткен едім. Оңашада әбден ойланғым келді, түсінгім келді. Мүмкін мен нәпсіме еріп топтан кетіп жатырмын ба деп өзіме мың рет сұрақ қойып, сынап көру үшін де кеткен ем. Мен бәрін түсіндім, көрдім. Жігіттердің менсіз жұмыс істей бергендері дұрыс екен деген ойға келдім.
Асхат: Сонда олар телеарналарға өтірік сұхбат берді ме?
Жігер: Төрт ай бойы біз сөйлестік, талқыладық. Кетемін дегенімде, бара бер, өзің әбден ойланып жауабын айтарсың деген болатын. Бір айдай уақыт арамызда байланыс мүлдем үзілді. Бір-бірімізді іздеген де жоқпыз. Содан-ақ белгілі ғой. Бірақ кейін топтың продюсері Бауыржан Есебаев, ол кісіге Алла разы болсын, бар жағдайды біліп, топтың жұмысын қайта тірілткендей болып еді...
Асхат: Ол кісі сенің кету себебіңді біледі ғой, иә?
Жігер: Иә, ол кісі себепті біледі.
Асхат: Сендер тек бір топтың әншілері ғана емессіңдер, бір-біріңе жақын бауырдай туыс боп кеткенсіңдер. Әдетте мұндай жағдайда әншілер өмірдегі сыйластықты, достықты үзіп топтағы жұмысын жалғастыра береді. Бұл коммерциялық жоба болғандықтан, жоспар бар, қаржыны қайта есептеу деген сияқты мәселелер бар. Сенің осының бәріне қарамай кетуің жігіттерге деген қатты ренішіңнің себебі сияқты. Өйткені жігіттер Жігер топқа келем десе қарсы емеспіз деп отыр.
Жігер: Бұл жерде бүкіл шындықты көтеріп, бет жыртысып айқайласып кетуге де болар еді. Бірақ мен сыпайы, мәдениетті түрде қоштасқым келді. Мен Умраға барғанда бәрін кешірдім, бірақ топта ән айтпаймын деп шештім.
Асхат: Өмірде де араласқың келмейді ме?
Жігер: Жоқ, өмірде мені қабылдайтын болса араласа беремін. Мен бұл жайлы жігіттерге де талай айтқанмын.
Асхат: Демек, сендер өмірде доссыңдар, алайда сахнада бір топта ән айтатын әріптес емессіңдер?
Жігер: Әріптес емеспіз.
Асхат: Діннен хабарың бар, жақында ғана Умраға барып келдің. Ислам мұсылмандарды кешірімді болуға шақырады және оған үлкен мән беріледі. Сен қажылыққа барып келген мұсылман ретінде діни тұрғыдан осы шешіміңді қаншалықты дұрыс деп ойлайсың?
Жігер: Мен жүрегіме үңілетін болсам онда мен үшін өте дұрыс. Алты деген санды біреу алты деп көреді, біреу тоғыз деп көреді ғой. Сол сияқты әркім әрқалай ойлайды, әрқалай дұрыс деп санайды. Мен үшін бұл шешім рухани тұрғыдан да дұрыс екен.
Асхат: Яғни топтан кеткеніңе өкінбейсің?
Жігер: Өкінемін.
Асхат: Сен күйзелісте жүргенде жігіттер ширақтық танытып сенен бұрын сұхбат беріп қойды. Мұндай жағдайда кім бірінші барып сұхбат береді, сол судан таза сүттен ақ боп шығады ғой. Бұл маған өте таныс жағдай. Саған жан-жақтан жауатын негативке дайынсың ба?
Жігер: Әрине, бәрін жайып салуға, жариялай салуға болар еді. Ешкімге тіл тигізгім келмейді. Кім менің сыртымнан не айтса да мен бәрін көтеремін. Мен қазір жалғызбын, сонда да шыдаймын деген ойдамын. Уақыт бәрін орнына қояды.
Асхат: Сонда сен енді «Меломен» тобына енді мүлдем оралмайсың ба?
Жігер: Жоқ, оралмаймын.
Асхат: «Меломен» тобы арқылы таныған жанкүйерлеріңе айтарың бар ма?
Жігер: Алаңдап жатқан тыңдармандар өте көп. Әлеуметтік желілердегі парақшаларым хаттарға толып қалды. Оларға алғысым шексіз. Ешнәрсе мәңгілік емес. Бәріне уақыт емші.
Асхат: Топтағы жігіттердің қайсысы саған жақынырақ?
Жігер: Әйй, сенің сұрақтарың-ай Асеке...(күлді)
Асхат: Жарайды, топтағы үш жігіттің үшеуі де саған жақын емес пе енді?
Жігер: Қап, қинадың-ау, сұрақтың астына алдың ғой..(күлді) Шыны керек соңғы кездері үшеуі де жақын емес болып кетті. Бұрындары ондай емес едік. Мүмкін менің топтан кететінімді түсінген соң солай істеген шығар.
Асхат: Сұхбаттасқаныңа рахмет. Жігерің жасымасын, шығармашылық табыс тілеймін.
Жігер: Рахмет!

Дәреже: 0.0/0


Қаралды: 150, Қосылды: 08.02.2017

Пікірлер 0







Біз Вконтакте
желісіндеміз

Сайттың жаңа дизайны ұнадыма?

Онлайн отырғандар: 6
Қонақтар: 6
Қолданушылар: 0