Өзге ұлт өкіліне тұрмысқа шығатын қыздар қоғамда өзекті мәселеге айналды. Бұл тақырып  отандық киногерлерді бей-жай қалдырмаған. Бұл жайында НТК арнасында «Ревю» бағдарламасында айтылды.
Режиссер Асқар Ұзабаев осы тақырыпқа байланысты жаңа туындысын «5 причин» деп атады. Бұл жөнінде Асқар Ұзабаев: «Бірде өзге ұлттың жігіттеріне тұрмысқа шыққан қазақ қыздарын азаматтығынан айыру керекті жайлы митингтің болғанын ғаламтордан көрдім. Бұл шын мәнісінде өте өзекті тақырып! Сондықтан, фильм таспалауды жөн деп шештік»,- дейді.
Бұл фильмде басты рөлдегі аруды сомдау Әсел Сәдуақасоваға бұйырған.  Оқиға желісі 2 жыл шет елде оқып, отанына оралған бойжеткеннің өмірінің сәттерінен сыр шертеді. Шекара асып, сүйгенін жолықтырған арудың таңдауы француз азаматына түседі. Алайда, тұрмысқа қамданған қалыңдыққа ата-анасы бірден қарсылық білдіріп, қазақ жігітінің жары болуды талап етеді. Бірақ, жанұясында жалғыз өскен бірбеткей қыз, айтқанынан қайтпақ емес!
Әсел Сәдуақасова – актриса, продюсер:«Бұл картинадағы қызбен, өмірдегі Әселдің арасы жер мен көктей. Тіпті бұл кейіпкерді сомдау барысында талай қиындықтар да болды. Фильмдегі ару — мінезі бар, ешкімге мойын бұрмайтын бойжеткен. Сондықтан, кино әлеміндегі жаныма жат алғашқы образым деп айтсам болады!»
Ал, махаббаттың ұлт талғамайтынын көпшіліктің санасына сіңіргісі келген түсірілім тобы, бұл картинаны қыс мезгіліне таяу көрерменіне ұсынбақ!

Дәреже: 0.0/0

Қаралды: 146, Қосылды: 08.06.2017

---